Ai 24 de fauré ie Werner Perathoner, l tati de nosc cumpani Luca, unit te nosta tlas de scola.
Bele danora ova Luca y Alex Glück fat n bel placat cun fotografies y la cumpëida de duc i majeri resultac dl campion de ji cui schi da Guton. Werner à cuntà de canche ‘l jiva a scola y che l ti savova sciot a lascé ora la scola per fé garejedes. Ël à purtà te tlas n per de schi y i si doi caschi che ‘l trajova sëura a fé si garejedes. Duc à nsci abù l’ucajion de prué sëura n casco y ti fé dumandes d’uni sort. Ti on nce dumandà, coche l fova a garejé pra la olimpiades. A furné ju n tel purtoi bel ndrët a passa 100 al’ëura se brujova suënz i schi, pona mussovel mudé ora n toch de sola y la lames. Si schi fova dla marca Head. Ël mussova ji dal dutor, datrai.
Werner Perathoner à venciù n grum de bedaies y copes. Ël à cuntà che ‘l ova nce venciù doi garejedes Super-G de Copa dl Mond, a Lillehammer y a Garmisch-Partenkirchen. Plu iedesc fovel ruà segondo o terzo pra garejedes de juissa. Pona s’àl mustrà si plu bela bedaia, una de scipa, che ël ova venciù: chëla de bront dla Copa dl Mond de Super-G.
Ne s’assàn mei mpensà de pudëi ancunté n iede n campion de ji cui schi te nosta tlas de scola. Ala fin àl dat a nëus duc na cherta cun si autogram, chël nes à drët plajù. L ie propi stat bel che Werner ie unì a nes cri te scola.
Isabell y Sofia